2026ko martxoaren 28a egun berezia izan zen guretzat. Korrika Euskal Herrian barrena zihoan, herriz herri, kilometroz kilometro, euskararen aldeko mezua zabalduz. Arratsaldeko 18:30ak aldera iritsi zen Azkoitiara, eta gu, ludotekako hezitzaile, haur eta familiak, prest geunden gure ekarpena egiteko.

Aurten, pauso bat harago ematea erabaki genuen: ludoteka bezala Korrikan parte hartzea. Horretarako, kilometro bat erosi genuen, ilusioz beteriko erabakia izan zena hasieratik. Ez zen soilik kilometro bat; guretzat, euskararekiko konpromisoaren adierazpen kolektiboa izan zen, belaunaldi berriei transmititu nahi diegun balio bat.

Egun handia iritsi aurretik, hainbat prestaketa lan egin genituen ludotekan. Haurrekin batera Korrikaren esanahia landu genuen: zer den, zergatik egiten den eta zer adierazten duen lekukoak. Euskararen garrantziaz hitz egin genuen, eta bakoitzak bere esperientziak eta bizipenak partekatu zituen. Egunez egun korrikaren jarraipena ere egin genuen ludotekatik zuzenean, gure herrira iritsi eta guri lekukoa eramatea tokatu zitzaigun arte. 

Familien inplikazioa ere nabarmena izan zen. Gure proposamena gurasoei azaldu orduko, batzuek segituen egin zuten bat proposamenarekin eta egunean bertan gurekin batera korrika egiteko prestutasuna eta eguna antolatzeko laguntza adierazi zuten. Horrela, guztion arteko elkarlaneko ekimena bihurtu zen. 

Martxoaren 28an, arratsaldea iritsi ahala, urduritasuna eta emozioa nabariak ziren. Kaleak jendez betetzen hasi ziren, eta Korrikaren giro berezi hori gure herrian ere sumatzen hasi zen, musika, oihuak, irribarreak eta, batez ere, euskararen aldeko batasuna.

Gure txanda iritsi zenean, haurrek hartu zuten protagonismoa. Haiek izan ziren lekukoa eramateko arduradunak, ilusioz eta harrotasunez. Momentu hunkigarria izan zen: korrika egiten zuten bitartean, ingurukoen animoak jasotzen zituzten, eta haien aurpegietan poza eta emozioa nabarmenak ziren.

Helduok ere alboan izan ginen, laguntzen eta babesten, baina argi zegoen egun hartako benetako protagonistak haurrak izan zirela. Haien bidez, euskararen etorkizuna irudikatu genuen, bizi-bizia eta indartsua.

Bestalde, egun hartan, Azkoitiak ozen erakutsi zuen herri euskalduna dela, eta euskararen alde borrokatzeko prest dagoen komunitatea dela. Kaleetan bizi izan zen giroak eta parte-hartze zabalak horren erakusgarri garbia izan ziren. Kaleak jendez gainezka bete ziren, herriko txikienetatik hasi eta nagusienetaraino, batzuk korrika ari ziren bitartean, beste batzuk animoz bete zuten bidea. Guztion artean, energia berezia piztea lortu genuen herrian.

Amaitzen joateko, esperientzia honek erakutsi digu bide egokian gaudela baina lanean jarraitu behar dugula. Ludotekatik, euskararen erabilera sustatzen jarraitu nahi dugu, eguneroko jardueretan zein halako ekimen berezietan. Argi daukagu halako bizipenek arrastoa uzten dutela haurrengan. Gaur lekukoa eraman duten haurrak biharko euskaldun aktiboak izango dira, eta hori da, azken finean, Korrikaren helburu nagusietako bat.

Horregatik, hemendik aurrera ere parte hartzen jarraitzeko asmoa dugu, ilusioz eta konpromisoz. Izan ere, euskararen aldeko bidea denon artean egiten da, pausoz pauso, kilometroz kilometro. Gogoratu behar dugu, Korrika ez dela ospatzen 10 egun hauetan soilik, baizik eta EGUNERO, ahoz aho erabiliz indartzen eta mantentzen dugula euskara!